An Ultimo Na Surmaton

Mauli akon Masbate
Hahanapon ko an
Tunay na Pagkamoot.
An pagkamoot na
Dili ko pagbabasolan
Hasta nalang.
Sa walo katuig na
pag-upod tan duwa
Guin hatag mo
Sa akon an magarbo
Na dunong
An dunong na
Dili makawat
Bisan sin-o man.
Guin tukdo mo
Sa akon an matahom
Na costumbre
An costumbre na
Dili mairog-irog
Bisan sin-o man.
Guin tukdo mo
Sa akon an maayo
Na pagpasunod
An pagpasunod na
Dili paghahabuan
Bisan sin-o man.
Guin udok mo
Sa akon an makatawo
Na pagseserbisyo
An pagseserbisyo na
Dili mababayadan
Bisan sin-o man.
Mauli akon Masbate
Ihahatag ko sa mga tawo
An guin pamana mo
Sa akon na katukduan
An tunay na pagkamoot
Na dili ko pagabasolan
Hasta nalang.

PUGULAN MO!

Sa Niyan
Namamatyagan
Mo an
Kusog san
Imo guinhawa,
San imo kalawasan.
Pero, dili
Udok sa
Huna-huna—
An tawo
Mientras
Nabubuhay
May
Kaluyahan.
An kaluyahan
Amo an aton
An kap’yerdihan.
Ayaw gayod
Paga-padaog
San imo
Kaluyahan,
Ina an
Mapasubo
San imo
Pagkatawo.
Pugulan mo!
Pugulan mo!
Timbangon
Mo sin
Maayo
Ayaw
Pagduda,
Pugulan mo
An Kaluyahan mo.

Haen Ka?

Haen ka?
Dili ko mabasol
Kun ako
namomo-ot saimo;
Dili ko mabasol
Kun ako
guin bayaan mo;
Kada gab-i
Ako nagahandom
Na makita ka;
Kada gab-i
Ako nagatangis
Kun naiisip ka
Dili ko aram kun
San-o pa kita
Makikit-an;
Dili ko aram kun
san-o pa kita
Mababagat.
Haen Ka?

AN LYABE

Ihatag an lyabe sa akon
Aabrihan ko an puertahan.
Aabrihan ko an bintana.
Ihatag an posporo sa akon.
Susug-an, papailawon ko
An ilawan san balay.
Iilopan, dadabukan ko
An pinalpagan na abuhan.
Kikilisan ko an bugas
Isasapna ko sa abuhan.
Kikiskisan ko an isda
Babarahinon ko sa
Aton pagmaranghodan.
Kun luto na, isasampi ko
Sa bandehado an luto;
Isasampi ko sa mangko
An sura puno sin gulay.
Tag-urusad sin kutsara.
Aagdahon ko kamo
Kay kita ma-iringkod
Palibot sa lamesa
Kita tanan malipay na
Magkarara-on; pagkatapos
Huhugasan ko an mga plato,
Kutsara, sampi, mangko,
Bandehado, kaldero, kag
Kaserola. Ilatag an banig;
Itaraytay an ulonan; kadi
Kamo kay aabrihan ko
An baul ni Papa kag Mama
Ipapakita ko saiyo an sulod—
Bubuksan ko na;
Nano an nakita niyo?
Adi, usad na rosaryohan.
Kita magtiripon kag kita
Magpangadye; aton otobon
An bilin ninda sa aton.

MIENTRAS TANTO

Ayaw pagpabay-i
An imo sadiri;
An imo mga anak;
An imo mga apo;
Kun ikaw nadidifisilan
Kun ikaw napapagal
Adi kami na maga-bantay
Sa imo kilidan
Sa aldaw kag gab-i.
Namamatyagan man namon
An kalipay kag pagti-os mo
Ayaw kahandal kay ikaw
Amon ama na mamomot-on.
Bisan sugad ka lang sana
Ayaw pagluhod kay ikaw
Amon ama na mapinalangga-on
Bisan sugad lang kita ini
Ayaw pagababasol kay ikaw
Amon ama na papalangga-on
Mientras ikaw adi sa gilid namon.

AN BITOON SA DAGAT

Katahom kita-on
San bitoon
Sa dagat
Nagapasikat
San sa iya
Diamante
Na kintab.
An bitoon
Sa dagat
Nagasayaw
San taghoy
San alipuros
Sa intermedyo.
An Bitoon
Sa dagat
Nagahapohap
San akon
Kamingaw.
An bitoon
Sa dagat
Nagabantay
San akon
Ama na
Naga-panagat.
Katahom kita-on
San bitoon
Sa dagat.

KALIPAY, PAGTIOS

An kalipay,
An pagti-os
Kakambal
San aton
Pagkabuhay.
An kalipay
An pagti-os
Himo san tawo.
May tawo na
Nalilipay
Sa oras san
Pagti-os;
May tawo na
Nagtiti-os
Sa oras san
Kalipay.
An kalipay,
An pagti-os
An espiho
San aton
Pagkamatay.