Al Oro Ea,* Aroroy!
Kadi kamo mga kaigmanghudan
Kadi kamo sa akon atubangan
Imuklat an mga piyong na mata
Iburarat sin dako kun poydi pa.
Niyan na kaadlawon, adi ako
Kag adi ka man, ini para saiyo.
Magarbo na pag-omaw namon
Sa pumuluyo na mapinalanggaon
Usad na lungsod na mamumut-on
Usad na lungsod mabinulig-buligon
Usad na lungsod na maka-diyosnon
Usad na lungsod maayon kaburut-on
Usad na lungsod kun aton kikitaon
Aroroy, kun aton siya tatawagon.
Niyan na adlaw huhubaan ko saiyo
An ilyabo na kintab na yaman san oro
Guin limbas san aton mga minero
Sa kabukidan, nagbuso, pagbutwa oro.
“Aroroy,” tam-is na siyak san iya ngaran.
Magselebrar kita kaigmanghudan
Isiyak naton an tam-is san iya ngaran
Ikurampag naton an aton mga palad
Usad na pagpakita naton san iya halad
An halad na magahatag sin kalipayan
Kay siya an lugar na aton sasayawan
An sayaw na dili malimot-limutan
Bisan diin hale kag sin-o ka pa man.
Kaigmanghudan, sa guin hatag na poder
Ibabandera ko saiyo amon maikontribwer
Usad na sayaw, amon ibandera sa pader
Pagdulang, kun tatawagon san mga lider.
Al Oro Ea,* Aroroy!
Noted: A silly corruption of the Spanish means gold.
November 14, 2009; 2:00 PM
During the Pagdulang Festival 2009
Aroroy, Masbate
